dariya ki masafat ne zamin ka nahin chhoDa

dariyā kī masāfat ne zamīñ kā nahīñ chhoḌā

yak-tarfa mohabbat ne kahīñ kā nahīñ chhoḌā

sadiyoñ huī tahzīb sazā aur jazā kī

ik sajda-e-sarmast ne diiñ kā nahīñ chhoḌā

tasvīr lagī rah ga.ī dīvār-e-khañDar par

jo rishta makāñ se thā makīñ kā nahīñ chhoḌā

sau ruup the vahdat meñ bhī us pāra-sifat ke

par ham ko but-e-dil ne yaqīñ kā nahīñ chhoḌā

ushshāq chale aa.e hathelī pe liye sar

vo husn-e-talab thā ki nahīñ kā nahīñ chhoḌā

mahkūm-o-tahī-dast jo haq māñgne nikle

phir taḳht bhī us taḳht-nashīñ kā nahīñ chhoḌā

jab hāthoñ se ruḳhsat huiiñ mahbūb duā.eñ

qatre ko bhī mehrāb-e-jabīñ kā nahīñ chhoḌā

dariya ki masafat ne zamin ka nahin chhoDa

yak-tarfa mohabbat ne kahin ka nahin chhoDa

sadiyon hui tahzib saza aur jaza ki

ek sajda-e-sarmast ne din ka nahin chhoDa

taswir lagi rah gai diwar-e-khanDar par

jo rishta makan se tha makin ka nahin chhoDa

sau rup the wahdat mein bhi us para-sifat ke

par hum ko but-e-dil ne yaqin ka nahin chhoDa

ushshaq chale aae hatheli pe liye sar

wo husn-e-talab tha ki nahin ka nahin chhoDa

mahkum-o-tahi-dast jo haq mangne nikle

phir taKHt bhi us taKHt-nashin ka nahin chhoDa

jab hathon se ruKHsat huin mahbub duaen

qatre ko bhi mehrab-e-jabin ka nahin chhoDa