dariya mein bahut kuchh hai rawani ke alawa

dariyā meñ bahut kuchh hai ravānī ke alāva

muddat se maiñ sairāb huuñ paanī ke alāva

ai shahr-e-sitam-zād tirī umr baḌī ho

kuchh aur batā naql-e-makānī ke alāva

īmān-shikan paikar-e-doshīza-e-ālam

sab kuchh hai tire paas javānī ke alāva

kis ahd-e-gunahgār ne lī āḳhirī hichkī

masrūf haiñ sab fātiha-ḳhvānī ke alāva

rañgoñ ko baratne kā hunar siikh chukā huuñ

kyā chāhiye ab terī nishānī ke alāva

duniyā se ta.alluq kā sabab kis ko batā.ūñ

ab dost kahāñ dushman-e-jānī ke alāva

kyā duuñ tujhe jaatī huī jāñ-bāz bahāro

kuchh paas nahīñ barg-e-ḳhizānī ke alāva

har shaḳhs mudāvā hai aqīdat se hai be-zār

mohlat hai kise pīr-e-muġhānī ke alāva

ash.ār kahāñ dete haiñ muñh dekhī gavāhī

'ḳhurshīd' kahāñ nūr-e-ma.ānī ke alāva

dariya mein bahut kuchh hai rawani ke alawa

muddat se main sairab hun pani ke alawa

ai shahr-e-sitam-zad teri umr baDi ho

kuchh aur bata naql-e-makani ke alawa

iman-shikan paikar-e-doshiza-e-alam

sab kuchh hai tere pas jawani ke alawa

kis ahd-e-gunahgar ne li aaKHiri hichki

masruf hain sab fatiha-KHwani ke alawa

rangon ko baratne ka hunar sikh chuka hun

kya chahiye ab teri nishani ke alawa

duniya se talluq ka sabab kis ko bataun

ab dost kahan dushman-e-jaani ke alawa

kya dun tujhe jati hui jaan-baz bahaaro

kuchh pas nahin barg-e-KHizani ke alawa

har shaKHs mudawa hai aqidat se hai be-zar

mohlat hai kise pir-e-mughani ke alawa

ashaar kahan dete hain munh dekhi gawahi

'KHurshid' kahan nur-e-maani ke alawa