dariya mein dur mauj-e-rawani ke par tha

dariyā meñ duur mauj-e-ravānī ke paar thā

kuchh tairtā huā thā jo paanī ke paar thā

yuuñ to dikhā.ī detā thā baḌh kar nuqūsh se

chhūne ga.e zarā to nishānī ke paar thā

unvān aur kuchh huā āḳhir kitāb kā

kirdār jaane kis kā kahānī ke paar thā

kis ne kise sadā.eñ dī maazī kī aaḌ meñ

jaane ye kaun yaad purānī ke paar thā

sāhil pe jaise ham to samā.at meñ ġharq the

lahje meñ is tarah vo zabānī ke paar thā

'parvez' shukr hai ki vo lafzoñ meñ zam huā

ik harf thā jo tez-ravānī ke paar thā

dariya mein dur mauj-e-rawani ke par tha

kuchh tairta hua tha jo pani ke par tha

yun to dikhai deta tha baDh kar nuqush se

chhune gae zara to nishani ke par tha

unwan aur kuchh hua aaKHir kitab ka

kirdar jaane kis ka kahani ke par tha

kis ne kise sadaen di mazi ki aaD mein

jaane ye kaun yaad purani ke par tha

sahil pe jaise hum to samaat mein gharq the

lahje mein is tarah wo zabani ke par tha

'parwez' shukr hai ki wo lafzon mein zam hua

ek harf tha jo tez-rawani ke par tha