dariya pe barishon ka asar kuchh nahin hua

dariyā pe bārishoñ kā asar kuchh nahīñ huā

mujh par bhī sāzishoñ kā asar kuchh nahīñ huā

duniyā ne koshisheñ to bahut kiiñ magar janāb

un par sifārishoñ kā asar kuchh nahīñ huā

dil chiir kar bhī maiñ ne dikhāyā use magar

zālim pe ḳhvāhishoñ kā asar kuchh nahīñ huā

vo mere har savāl pe patthar banā rahā

nādāñ pe pursishoñ kā asar kuchh nahīñ huā

'santosh' maiñ ne DhūñDhā use har dayār meñ

par merī kāvishoñ kā asar kuchh nahīñ huā

dariya pe barishon ka asar kuchh nahin hua

mujh par bhi sazishon ka asar kuchh nahin hua

duniya ne koshishen to bahut kin magar janab

un par sifarishon ka asar kuchh nahin hua

dil chir kar bhi main ne dikhaya use magar

zalim pe KHwahishon ka asar kuchh nahin hua

wo mere har sawal pe patthar bana raha

nadan pe pursishon ka asar kuchh nahin hua

'santosh' main ne DhunDha use har dayar mein

par meri kawishon ka asar kuchh nahin hua