dariyaon ke sitam se bachata rahe koi

dariyāoñ ke sitam se bachātā rahe koī

ḳhvābīda sāhiloñ ko jagātā rahe koī

sadiyoñ purānī ḳhaak se tā'mīr jism meñ

kab tak lahū kā baar uThātā rahe koī

jo log roz-o-shab ke ta'āqub meñ chal diye

vāpas unheñ safar se bulātā rahe koī

parvāz ke asiir hue mere bāl-o-par

ūñchā.iyoñ se mujh ko girātā rahe koī

kab tak ġhamoñ se chuur savāloñ kī khetiyāñ

sailāb-e-justujū se bachātā rahe koī

bīmār mausamoñ kā mudāvā muhāl hai

āñkhoñ meñ laakh rañg sajātā rahe koī

dariyaon ke sitam se bachata rahe koi

KHwabida sahilon ko jagata rahe koi

sadiyon purani KHak se ta'mir jism mein

kab tak lahu ka bar uThata rahe koi

jo log roz-o-shab ke ta'aqub mein chal diye

wapas unhen safar se bulata rahe koi

parwaz ke asir hue mere baal-o-par

unchaiyon se mujh ko giraata rahe koi

kab tak ghamon se chur sawalon ki khetiyan

sailab-e-justuju se bachata rahe koi

bimar mausamon ka mudawa muhaal hai

aankhon mein lakh rang sajata rahe koi