dariyaon ko haal suna kar raqs kiya

dariyāoñ ko haal sunā kar raqs kiyā

sahrāoñ kī ḳhaak uḌā kar raqs kiyā

qais tumhārī sunnat aise zinda kī

hāthoñ meñ kashkol uThā kar raqs kiyā

qais mujhe is baat pe hairat hotī hai

tū ne kaise dasht meñ jā kar raqs kiyā

un logoñ kī hālat dekhne vaalī thī

jin logoñ ne vajd meñ aa kar raqs kiyā

jab merī āvāz na kānoñ tak pahuñchī

phir maiñ ne tahrīr meñ aa kar raqs kiyā

niilī chhat pe lā-mahdūd parinde the

aaj kisī ne ashk bahā kar raqs kiyā

bhed khulā jis shaḳhs pe tere hone kā

us ne tere qurb ko pā kar raqs kiyā

chhan chhanā chhan chhan chhan chhan kī aa.ī sadā

ghuñghrū pahne hosh gañvā kar raqs kiyā

'mustahsan' maiñ 'jāmī' huuñ 'mansūr' nahīñ

dilbar ko ash.ār sunā kar raqs kiyā

dariyaon ko haal suna kar raqs kiya

sahraon ki KHak uDa kar raqs kiya

qais tumhaari sunnat aise zinda ki

hathon mein kashkol uTha kar raqs kiya

qais mujhe is baat pe hairat hoti hai

tu ne kaise dasht mein ja kar raqs kiya

un logon ki haalat dekhne wali thi

jin logon ne wajd mein aa kar raqs kiya

jab meri aawaz na kanon tak pahunchi

phir main ne tahrir mein aa kar raqs kiya

nili chhat pe la-mahdud parinde the

aaj kisi ne ashk baha kar raqs kiya

bhed khula jis shaKHs pe tere hone ka

us ne tere qurb ko pa kar raqs kiya

chhan chhana chhan chhan chhan chhan ki aai sada

ghunghru pahne hosh ganwa kar raqs kiya

'mustahsan' main 'jami' hun 'mansur' nahin

dilbar ko ashaar suna kar raqs kiya