dariyaon mein rahte hue pyasa to nahin hun

dariyāoñ meñ rahte hue pyāsā to nahīñ huuñ

pyāsā jo hai muddat se vo sahrā to nahīñ huuñ

kyā jāniye duniyā meñ tirī huuñ ki nahīñ bhī

rahte hue maujūd maiñ khoyā to nahīñ huuñ

vo saath mire chāñd sitārā hai falak har

ai dost shab-e-hijr meñ tanhā to nahīñ huuñ

tum vahm-o-gumāñ jaan ke anjān na honā

ik Thos haqīqat huuñ maiñ dhokā to nahīñ huuñ

chāhe to vo sāhil se kare ek ishārā

maiñ Duub rahā huuñ abhī Duubā to nahīñ huuñ

thā faisla is tark-e-vafādārī kā bāham

tum bhuul ga.e maiñ tumheñ bholā to nahīñ huuñ

hairat se bhalā kyoñ mujhe taktā hai zamāna

ai parda-e-aflāk tamāshā to nahīñ huuñ

dariyaon mein rahte hue pyasa to nahin hun

pyasa jo hai muddat se wo sahra to nahin hun

kya jaaniye duniya mein teri hun ki nahin bhi

rahte hue maujud main khoya to nahin hun

wo sath mere chand sitara hai falak har

ai dost shab-e-hijr mein tanha to nahin hun

tum wahm-o-guman jaan ke anjaan na hona

ek Thos haqiqat hun main dhoka to nahin hun

chahe to wo sahil se kare ek ishaara

main Dub raha hun abhi Duba to nahin hun

tha faisla is tark-e-wafadari ka baham

tum bhul gae main tumhein bhola to nahin hun

hairat se bhala kyon mujhe takta hai zamana

ai parda-e-aflak tamasha to nahin hun