درمیاں فاصلہ نہیں ہوگا

درمیاں فاصلہ نہیں ہوگا

ہم سے شکوہ گلہ نہیں ہوگا

عمر بھر چاہے اس سے مل نہ سکیں

وہ مگر بے وفا نہیں ہوگا

خاک ہو جائیں گر تری خاطر

عشق میں یہ برا نہیں ہوگا

عمر بھر مجھ پہ جو رہا طاری

کیا مجھے سوچتا نہیں ہوگا

تم کو سو یار مل گئے ہوں گے

ہم سا پاگل ملا نہیں ہوگا

ڈھونڈئیے تو ملے گی راہ نئی

ایک خواہش سے کیا نہیں ہوگا

کوششیں لاکھ کر کے دیکھو تم

گر نہ چاہے خدا نہیں ہوگا

یاد آئے گی کچھ دنوں اس کی

پھر تو یہ سلسلہ نہیں ہوگا

شہر سے گاؤں لوٹوں تو ساحلؔ

گاؤں اب پہلے سا نہیں ہوگا