darmiyan gar na tera wada-e-farda hota

darmiyāñ gar na tirā vāda-e-fardā hotā

kis ko manzūr ye zahr-e-ġham-e-duniyā hotā

kyā qayāmat hai ki ab maiñ bhī nahīñ vo bhī nahīñ

dekhnā thā to use duur se dekhā hotā

kāsa-e-zaḳhm-talab le ke chalā huuñ ḳhālī

sañg-reza hī koī aap ne pheñkā hotā

falsafa sar-ba-garebāñ hai baḌī muddat se

kuchh na hotā to ḳhudā jaane ki phir kyā hotā

ham bhī nau-ḳhez shuāoñ kī balā.eñ lete

apne zindāñ meñ agar koī darīcha hotā

aap ne hāl-e-dil-e-zār to pūchhā lekin

pūchhnā thā to koī us kā mudāvā hotā

dast-e-muflis se tahī-tar hai safīna 'anvar'

is pahuñchne se to sāhil pe na pahuñchā hotā

darmiyan gar na tera wada-e-farda hota

kis ko manzur ye zahr-e-gham-e-duniya hota

kya qayamat hai ki ab main bhi nahin wo bhi nahin

dekhna tha to use dur se dekha hota

kasa-e-zaKHm-talab le ke chala hun KHali

sang-reza hi koi aap ne phenka hota

falsafa sar-ba-gareban hai baDi muddat se

kuchh na hota to KHuda jaane ki phir kya hota

hum bhi nau-KHez shuaon ki balaen lete

apne zindan mein agar koi daricha hota

aap ne haal-e-dil-e-zar to puchha lekin

puchhna tha to koi us ka mudawa hota

dast-e-muflis se tahi-tar hai safina 'anwar'

is pahunchne se to sahil pe na pahuncha hota