darogh-goi ki fitrat ko aag lag jae

daroġh-goī kī fitrat ko aag lag jaa.e

tumhārī doġhlī sūrat ko aag lag jaa.e

na jaane kitne hī logoñ ko maar Daalā hai

ḳhudā kare ki mohabbat ko aag lag jaa.e

faqīr-e-shahr ko fāqa-kashī ne maar diyā

amīr-e-shahr kī daulat ko aag lag jaa.e

kahīñ mile jo vafā to ḳharīd kar rakh lo

na jaane kab yahāñ qīmat ko aag lag jaa.e

ma.āl-e-ḳhuftagī dekho ye qaum chīḳh rahī

zahīn fikr kī ġhaflat ko aag lag jaa.e

haqīr samjhe sabhī ko zalīl kartā phire

anā-parast kī shohrat ko aag lag jaa.e

badal sake na adāvat ko jo uḳhuvvat se

to aise logoñ kī sohbat ko aag lag jaa.e

chhupā ho maqsad-e-shohrat agar bhalā.ī meñ

to aisī izzat-o-shohrat ko aag lag jaa.e

firāq-e-jānāñ se 'as.ad' kā dil huā chhalnī

dūā-e-dil hai ki hijrat ko aag lag jaa.e

darogh-goi ki fitrat ko aag lag jae

tumhaari doghli surat ko aag lag jae

na jaane kitne hi logon ko mar Dala hai

KHuda kare ki mohabbat ko aag lag jae

faqir-e-shahr ko faqa-kashi ne mar diya

amir-e-shahr ki daulat ko aag lag jae

kahin mile jo wafa to KHarid kar rakh lo

na jaane kab yahan qimat ko aag lag jae

maal-e-KHuftagi dekho ye qaum chiKH rahi

zahin fikr ki ghaflat ko aag lag jae

haqir samjhe sabhi ko zalil karta phire

ana-parast ki shohrat ko aag lag jae

badal sake na adawat ko jo uKHuwwat se

to aise logon ki sohbat ko aag lag jae

chhupa ho maqsad-e-shohrat agar bhalai mein

to aisi izzat-o-shohrat ko aag lag jae

firaq-e-jaanan se 'asad' ka dil hua chhalni

dua-e-dil hai ki hijrat ko aag lag jae