darun-e-ishq ajab tana-bana banta hai

darūn-e-ishq ajab tānā-bānā bantā hai

zarā sī baat kā kitnā fasāna bantā hai

miyāñ ye shāḳh-e-mohabbat tumhāre sāmne hai

banāo us pe agar āshiyāna bantā hai

hamāre dard paḌe haiñ chahār samt yahāñ

so muskurāo yahāñ muskurānā bantā hai

chhupā.e phirtā huuñ āñkhoñ meñ ashk ke motī

ki jam.a karne se daulat ḳhazāna bantā hai

ye dasht hai yahāñ dīvāngī zarūrī hai

har ek shaḳhs junūñ kā nishāna bantā hai

mirī vafāoñ ko ab e.atibār hāsil hai

so us ke ghar meñ mirā ānā-jānā bantā hai

tumhāre jaisī hai us ke mizāj meñ shoḳhī

ye rang merī nazar meñ uḌānā bantā hai

use batāte haiñ 'ġhālib' ke rishta-dār haiñ ham

hamāre sāmne jo bhī 'yagānā' bantā hai

rahī hoñ pāñch chhe pushteñ darūn-e-dasht tabhī

mire aziiz junūñ kā gharānā bantā hai

darun-e-ishq ajab tana-bana banta hai

zara si baat ka kitna fasana banta hai

miyan ye shaKH-e-mohabbat tumhaare samne hai

banao us pe agar aashiyana banta hai

hamare dard paDe hain chahaar samt yahan

so muskurao yahan muskurana banta hai

chhupae phirta hun aankhon mein ashk ke moti

ki jama karne se daulat KHazana banta hai

ye dasht hai yahan diwangi zaruri hai

har ek shaKHs junun ka nishana banta hai

meri wafaon ko ab eatibar hasil hai

so us ke ghar mein mera aana-jaana banta hai

tumhaare jaisi hai us ke mizaj mein shoKHi

ye rang meri nazar mein uDana banta hai

use batate hain 'ghaalib' ke rishta-dar hain hum

hamare samne jo bhi 'yagana' banta hai

rahi hon panch chhe pushten darun-e-dasht tabhi

mere aziz junun ka gharana banta hai