darun-e-jism ek tufan uTha tha

darūn-e-jism ik tūfāñ uThā thā

jo dekhā duur tak malba paḌā thā

musalsal dhuul se jaise aTā thā

hameñ to āsmāñ sahrā lagā thā

na us shab chāñd ubhrā aur na taare

hamārā hijr to tanhā kaTā thā

jo tum bichhḌe to ḳhud ko chhoḌ aa.e

hamārī dastaras meñ aur kyā thā

na utrī chāñdnī na roī shabnam

ajab ik dhund kā mausam banā thā

musalsal uljhanoñ meñ vo ghirā thā

mujhe vo shaḳhs kab tanhā milā thā

kuredā kyā utar aa.ī namī sī

vo sahrā hī abhī shāyad nayā thā

uḌaa.ī dhuul ḳhvāboñ meñ musalsal

mirī āñkhoñ meñ ik vahshat-kada thā

javāz is meñ ḳhushī kā kyā hai 'tārā'

ba-sad mahrūmī vo tujh se milā thā

darun-e-jism ek tufan uTha tha

jo dekha dur tak malba paDa tha

musalsal dhul se jaise aTa tha

hamein to aasman sahra laga tha

na us shab chand ubhra aur na tare

hamara hijr to tanha kaTa tha

jo tum bichhDe to KHud ko chhoD aae

hamari dastaras mein aur kya tha

na utri chandni na roi shabnam

ajab ek dhund ka mausam bana tha

musalsal uljhanon mein wo ghira tha

mujhe wo shaKHs kab tanha mila tha

kureda kya utar aai nami si

wo sahra hi abhi shayad naya tha

uDai dhul KHwabon mein musalsal

meri aankhon mein ek wahshat-kada tha

jawaz is mein KHushi ka kya hai 'tara'

ba-sad mahrumi wo tujh se mila tha