darun-e-KHana-e-dil koi hao-hu nahin hai

darūn-e-ḳhāna-e-dil koī hāo-hū nahīñ hai

ragoñ meñ dauḌtā phirtā hai kuchh lahū nahīñ hai

maiñ din ko raat likhkhūñ aur siyāh raat ko din

munāfiqat to miyāñ shā.iroñ kī ḳhū nahīñ hai

ye apnī jaan bhī maiñ tum pe vaar saktā huuñ

ye sachchī baat hai is meñ koī ġhulū nahīñ hai

mire liye yahī kaafī hai tū mayassar hai

so ab mazīd mujhe koī aarzū nahīñ hai

ye baat mujh pe bahut der meñ khulī hai 'vasīm'

ki mere qad ke barābar mirā adū nahīñ hai

darun-e-KHana-e-dil koi hao-hu nahin hai

ragon mein dauDta phirta hai kuchh lahu nahin hai

main din ko raat likhkhun aur siyah raat ko din

munafiqat to miyan shairon ki KHu nahin hai

ye apni jaan bhi main tum pe war sakta hun

ye sachchi baat hai is mein koi ghulu nahin hai

mere liye yahi kafi hai tu mayassar hai

so ab mazid mujhe koi aarzu nahin hai

ye baat mujh pe bahut der mein khuli hai 'wasim'

ki mere qad ke barabar mera adu nahin hai