darwaze par Tank di usne aahaT mere aane ki

darvāze par Taañk dī us ne aahaT mere aane kī

aur havā meñ phail ga.ī sargoshī ek fasāne kī

saare rishte saare bandhan kāñch kā paikar hote haiñ

kāñch kī fitrat hai kirchoñ se pahle shor machāne kī

bāhar rangoñ kī barsāt hai aur andar us kī rim-jhim

aise meñ titlī ko kahāñ fursat hai par phailāne kī

raushan-dāñ se dhuup kā TukḌā aa ke mere paas girā

aur phir sūraj ne koshish kī mujh se haath milāne kī

bādal dekh ke alganiyoñ par kapḌe phailā.e ham ne

aur phir kī ek ik se shikāyat un ke bhīge jaane kī

koī khaḌā hai āñkhoñ meñ phūloñ ke thaal uThā.e hue

par merī 'ādat hī nahīñ hai sajne aur sajāne kī

kitnī hī yādoñ ke 'humairā' raushan haiñ be-nām charāġh

aaj koī dekhe to raunaq mere ā.ina-ḳhāne kī

darwaze par Tank di us ne aahaT mere aane ki

aur hawa mein phail gai sargoshi ek fasane ki

sare rishte sare bandhan kanch ka paikar hote hain

kanch ki fitrat hai kirchon se pahle shor machane ki

bahar rangon ki barsat hai aur andar us ki rim-jhim

aise mein titli ko kahan fursat hai par phailane ki

raushan-dan se dhup ka TukDa aa ke mere pas gira

aur phir suraj ne koshish ki mujh se hath milane ki

baadal dekh ke alganiyon par kapDe phailae hum ne

aur phir ki ek ek se shikayat un ke bhige jaane ki

koi khaDa hai aankhon mein phulon ke thaal uThae hue

par meri 'adat hi nahin hai sajne aur sajaane ki

kitni hi yaadon ke 'humaira' raushan hain be-nam charagh

aaj koi dekhe to raunaq mere aaina-KHane ki