darwazon par din bhar ki thakan tahrir hui

darvāzoñ par din bhar kī thakan tahrīr huī

mire shahr kī shab har chaukhaT kī zanjīr huī

sab dhuup utar ga.ī TuuTī huī dīvāroñ se

magar ek kiran mere ḳhvāboñ meñ asiir huī

mirā suunā ghar mire siine se lag kar rotā hai

mire bhaa.ī tumheñ is baar bahut tāḳhīr huī

hameñ rañj bahut thā dasht kī be-imkānī kā

lo ġhaib se phir ik shakl zuhūr-pazīr huī

koī hairat mere lahje kī pahchān banī

koī chāhat mere lafzoñ kī tāsīr huī

is dard ke qātil-manzar ko ilzām na do

ye to dekhne vaalī āñkhoñ kī taqsīr huī

kisī lashkar se kahīñ bahtā paanī ruktā hai

kabhī jū-e-ravāñ kisī zālim kī jāgīr huī

phir lauh pe luTne vaale ḳhazāne likhe ga.e

mujhe ab ke baras bhī daulat-e-jāñ taqdīr huī

darwazon par din bhar ki thakan tahrir hui

mere shahr ki shab har chaukhaT ki zanjir hui

sab dhup utar gai TuTi hui diwaron se

magar ek kiran mere KHwabon mein asir hui

mera suna ghar mere sine se lag kar rota hai

mere bhai tumhein is bar bahut taKHir hui

hamein ranj bahut tha dasht ki be-imkani ka

lo ghaib se phir ek shakl zuhur-pazir hui

koi hairat mere lahje ki pahchan bani

koi chahat mere lafzon ki tasir hui

is dard ke qatil-manzar ko ilzam na do

ye to dekhne wali aankhon ki taqsir hui

kisi lashkar se kahin bahta pani rukta hai

kabhi ju-e-rawan kisi zalim ki jagir hui

phir lauh pe luTne wale KHazane likhe gae

mujhe ab ke baras bhi daulat-e-jaan taqdir hui