darwesh qaid-e-gham mein dil-e-zar ho gaya

darvesh qaid-e-ġham meñ dil-e-zār ho gayā

āzād ho gayā jo giraftār ho gayā

yūsuf bhī laakh jaañ se ḳharīdār ho gayā

tū ghar meñ ġhul tirā sar-e-bāzār ho gayā

raḳhna tarīq-e-ishq meñ Daalā jo hijr ne

nāsūr dil kā rauzan-e-dīvār ho gayā

qātil ne qatl bhī jo subuk jaan kar kiyā

lāsha ba-rañg-e-rūh subuk-bār ho gayā

uglā jo zahr af.ī-e-gesū-e-yār ne

har mū-e-mār-e-zulf-e-siyah maar ho gayā

soyā haiñ vasl-e-shauq meñ jaagā vo naaz se

maiñ be-ḳhabar huā vo ḳhabar-dār ho gayā

bhāgā gayā na laash pe ġhash khā ke gir paḌā

qātil ye mere ḳhuuñ meñ giraftār ho gayā

ishq-e-sanam gale kā mire haar ho gayā

gardan kā taar rishta-e-zunnār ho gayā

paiġhām-e-vasl hī meñ ḳhafā yaar ho gayā

iqrār ho gayā na kuchh inkār ho gayā

shām-o-sahar chamakne jo dāġh-e-jigar lagā

ḳhurshīd-e-roz-o-sham-e-shab-tār ho gayā

kār-e-rah-e-ḳhudā na huā maut aa ga.ī

ġhaflat se banda dīda-e-bedār ho gayā

qātil jo gul khilāne lagā shāḳh-e-teġh se

maqtal bhī dam meñ taḳhta-e-gulzār ho gayā

khodī jo nahr kohkan-e-jeb-e-chāk ne

sau jā se TukḌe dāman-e-kohsār ho gayā

yād-e-butāñ se ka.aba-e-dil but-kada huā

tār-e-nafas bhī rishta-e-zunnār ho gayā

royā tulū-e-mehr-e-tan-e-ġhaur par jo 'arsh'

āb-e-ravāñ se jāma-e-zartār ho gayā

darwesh qaid-e-gham mein dil-e-zar ho gaya

aazad ho gaya jo giraftar ho gaya

yusuf bhi lakh jaan se KHaridar ho gaya

tu ghar mein ghul tera sar-e-bazar ho gaya

raKHna tariq-e-ishq mein Dala jo hijr ne

nasur dil ka rauzan-e-diwar ho gaya

qatil ne qatl bhi jo subuk jaan kar kiya

lasha ba-rang-e-ruh subuk-bar ho gaya

ugla jo zahr afi-e-gesu-e-yar ne

har mu-e-mar-e-zulf-e-siyah mar ho gaya

soya hain wasl-e-shauq mein jaga wo naz se

main be-KHabar hua wo KHabar-dar ho gaya

bhaga gaya na lash pe ghash kha ke gir paDa

qatil ye mere KHun mein giraftar ho gaya

ishq-e-sanam gale ka mere haar ho gaya

gardan ka tar rishta-e-zunnar ho gaya

paigham-e-wasl hi mein KHafa yar ho gaya

iqrar ho gaya na kuchh inkar ho gaya

sham-o-sahar chamakne jo dagh-e-jigar laga

KHurshid-e-roz-o-sham-e-shab-tar ho gaya

kar-e-rah-e-KHuda na hua maut aa gai

ghaflat se banda dida-e-bedar ho gaya

qatil jo gul khilane laga shaKH-e-tegh se

maqtal bhi dam mein taKHta-e-gulzar ho gaya

khodi jo nahr kohkan-e-jeb-e-chaak ne

sau ja se TukDe daman-e-kohsar ho gaya

yaad-e-butan se kaba-e-dil but-kada hua

tar-e-nafas bhi rishta-e-zunnar ho gaya

roya tulu-e-mehr-e-tan-e-ghaur par jo 'arsh'

aab-e-rawan se jama-e-zartar ho gaya