dasht aankhon mein tha aawaz mein virani thi

dasht āñkhoñ meñ thā āvāz meñ vīrānī thī

khā gayā shahr use kahte haiñ dīvānī thī

lams ik dhuup kā kaafī thā samajh jaane ko

barf thā jism magar rūh-e-ravāñ paanī thī

jab talak ishq sunātā rahā ham sunte rahe

baad is ke to kahānī baḌī be-ma.anī thī

ek lahze meñ nazar aa gayā thā sach ham ko

ziist āñkhoñ se guzartī huī uryānī thī

dekhte dekhte āñkhoñ meñ utar aa.ī thī

har nazāre meñ nihāñ ik na.ī hairānī thī

maiñ ne ḳhud par kabhī hone na dī zāhir lekin

mujh meñ terī kamī har shaḳhs ne pahchānī thī

tum ne bekār hī hāthoñ ko jalāyā 'mīrā'

aag kuchh der meñ vaise bhī to bujh jaanī thī

dasht aankhon mein tha aawaz mein virani thi

kha gaya shahr use kahte hain diwani thi

lams ek dhup ka kafi tha samajh jaane ko

barf tha jism magar ruh-e-rawan pani thi

jab talak ishq sunata raha hum sunte rahe

baad is ke to kahani baDi be-mani thi

ek lahze mein nazar aa gaya tha sach hum ko

zist aankhon se guzarti hui uryani thi

dekhte dekhte aankhon mein utar aai thi

har nazare mein nihan ek nai hairani thi

main ne KHud par kabhi hone na di zahir lekin

mujh mein teri kami har shaKHs ne pahchani thi

tum ne bekar hi hathon ko jalaya 'mira'

aag kuchh der mein waise bhi to bujh jaani thi