dasht-e-azar mein Khaaron pe chalaya hua main

dasht-e-āzār meñ ḳhāroñ pe chalāyā huā maiñ

sañg-bārī ke tarashshoh meñ nahāyā huā maiñ

chhoḌ aayā huuñ saf-e-jāñ pe nishāñ sajdoñ ke

nok-e-neza pe dam-e-asr uThāyā huā maiñ

teġh-e-qātil pe chamaktī hai mire ḳhuun kī zau

shahr-e-bedād meñ ḳhat likh ke bulāyā huā maiñ

ḳhusbū-e-shauq-e-shahādat se mo.attar ho kar

gulshan-e-mahzar-e-mīqāt pe aayā huā maiñ

sub.h-e-ālām ke sūraj ko sadā detā huā

vus.at-e-shām-e-ġharībāñ meñ samāyā huā maiñ

dasht-e-azar mein KHaron pe chalaya hua main

sang-bari ke tarashshoh mein nahaya hua main

chhoD aaya hun saf-e-jaan pe nishan sajdon ke

nok-e-neza pe dam-e-asr uThaya hua main

tegh-e-qatil pe chamakti hai mere KHun ki zau

shahr-e-bedad mein KHat likh ke bulaya hua main

KHusbu-e-shauq-e-shahadat se moattar ho kar

gulshan-e-mahzar-e-miqat pe aaya hua main

subh-e-alam ke suraj ko sada deta hua

wusat-e-sham-e-ghariban mein samaya hua main