dasht-e-ehsas mein aawaz-e-dara milti hai

dasht-e-ehsās meñ āvāz-e-darā miltī hai

mujh ko har saañs meñ tamhīd-e-navā miltī hai

raat so jaa.e to bedār havā miltī hai

ghar kī dahlīz pe qadmoñ kī sadā miltī hai

tujh ko shāyad nahīñ mālūm harīf-e-jāda

ye saḌak dasht-e-balā-ḳhez se jā miltī hai

ham jise bechnā chāheñ vo ḳharīdeñ kyoñ kar

zindagī ham se tū bāzār meñ kyā miltī hai

chāñd paane ko musir ho koī rotā bachcha

ā.īna haath meñ de do to jazā miltī hai

ghar ke shīshoñ pe tirā naam likhā hai jab se

dhuup gul-dān ke phūloñ se ḳhafā miltī hai

tujh ko socheñ bhī nahīñ aur kahānī kī tarah

baat kyoñ kūcha-o-bāzār se jā miltī hai

dasht-e-ehsas mein aawaz-e-dara milti hai

mujh ko har sans mein tamhid-e-nawa milti hai

raat so jae to bedar hawa milti hai

ghar ki dahliz pe qadmon ki sada milti hai

tujh ko shayad nahin malum harif-e-jada

ye saDak dasht-e-bala-KHez se ja milti hai

hum jise bechna chahen wo KHariden kyon kar

zindagi hum se tu bazar mein kya milti hai

chand pane ko musir ho koi rota bachcha

aaina hath mein de do to jaza milti hai

ghar ke shishon pe tera nam likha hai jab se

dhup gul-dan ke phulon se KHafa milti hai

tujh ko sochen bhi nahin aur kahani ki tarah

baat kyon kucha-o-bazar se ja milti hai