dasht-e-ehsas mein hum itne akele kab the

dasht-e-ehsās meñ ham itne akele kab the

dukh to pahle bhī the par itne ghanere kab the

ham to nikle the havāoñ kā muqaddar le kar

ham kisī moḌ pe dam lene ko Thahre kab the

jaise anjān koī jaise koī begāna

ḳhud se katrā ke ham aise bhī nikalte kab the

buġhz kī dhuup se ham bhaag ke jaate to kahāñ

shahr-e-ahbāb meñ vā dil ke darīche kab the

har taraf shāḳhoñ pe laTkī thī 'sabā' ḳhāmoshī

raat ke peḌ meñ āvāz ke jhūle kab the

dasht-e-ehsas mein hum itne akele kab the

dukh to pahle bhi the par itne ghanere kab the

hum to nikle the hawaon ka muqaddar le kar

hum kisi moD pe dam lene ko Thahre kab the

jaise anjaan koi jaise koi begana

KHud se katra ke hum aise bhi nikalte kab the

bughz ki dhup se hum bhag ke jate to kahan

shahr-e-ahbab mein wa dil ke dariche kab the

har taraf shaKHon pe laTki thi 'saba' KHamoshi

raat ke peD mein aawaz ke jhule kab the