dasht-e-jalal phaila hai aur be-‘asa hun main

dasht-e-jalāl phailā hai aur be-‘asā huuñ maiñ

hairat-zada huuñ zinda huuñ kyā mo'jiza huuñ maiñ

mere ḳhudā-e-‘ishq kahāñ hai kalām kar

rusvā.iyoñ ke tuur pe kab se khaḌā huuñ maiñ

galiyāñ simaT ke mujh meñ jalāne lagīñ diye

kis lau meñ gum huuñ kis kī taraf jā rahā huuñ maiñ

ab kis safar pe jā.ūñ batā nāznīn-e-vahm

apnī qabā-e-rūh bhī tah kar chukā huuñ maiñ

bāshindagān-e-qarya-e-dil saf-ba-saf raheñ

ik kā.enātī ġham kī girah kholtā huuñ maiñ

merā pata Thikāna kahāñ juz mire sivā

merī talāsh kyā ki abhī gum-shuda huuñ maiñ

dasht-e-jalal phaila hai aur be-‘asa hun main

hairat-zada hun zinda hun kya mo'jiza hun main

mere KHuda-e-‘ishq kahan hai kalam kar

ruswaiyon ke tur pe kab se khaDa hun main

galiyan simaT ke mujh mein jalane lagin diye

kis lau mein gum hun kis ki taraf ja raha hun main

ab kis safar pe jaun bata naznin-e-wahm

apni qaba-e-ruh bhi tah kar chuka hun main

bashindagan-e-qarya-e-dil saf-ba-saf rahen

ek kaenati gham ki girah kholta hun main

mera pata Thikana kahan juz mere siwa

meri talash kya ki abhi gum-shuda hun main