dasht-e-pur-haul ki diwar girane ke liye

dasht-e-pur-haul kī dīvār girāne ke liye

ik dhamākā hī sahī dil ko hilāne ke liye

roz-e-avval se jise roke khaḌī haiñ rāheñ

rāsta chāhiye us shaḳhs ko laane ke liye

raunaq-e-dīd to mushkil thī magar aise hī

us ko āvāz lagānī thī bulāne ke liye

rāsta bhuul gayā huuñ maiñ ḳhud apne ghar kā

bhūle-bhaTkoñ ko koī raah dikhāne ke liye

kyā ḳhabar thī vahī dīvār giregī mujh par

jis kī tasvīr utārī thī sajāne ke liye

bhūle bisre kabhī ḳhvāboñ meñ chale aanā thā

be-kasī dasht-e-mohabbat kī baḌhāne ke liye

us ne darvāze pe ek dard sajā rakkhā hai

ghar ke māhaul ko rangīn banāne ke liye

raushnī jis kī sitāroñ kā jigar chaak kare

ik diyā aisā jalānā hai zamāne ke liye

ḳhuun mahke to kabhī dard kī būñdeñ Tapkeñ

sher ik chāhiye 'ajmal' ke fasāne ke liye

dasht-e-pur-haul ki diwar girane ke liye

ek dhamaka hi sahi dil ko hilane ke liye

roz-e-awwal se jise roke khaDi hain rahen

rasta chahiye us shaKHs ko lane ke liye

raunaq-e-did to mushkil thi magar aise hi

us ko aawaz lagani thi bulane ke liye

rasta bhul gaya hun main KHud apne ghar ka

bhule-bhaTkon ko koi rah dikhane ke liye

kya KHabar thi wahi diwar giregi mujh par

jis ki taswir utari thi sajaane ke liye

bhule bisre kabhi KHwabon mein chale aana tha

be-kasi dasht-e-mohabbat ki baDhane ke liye

us ne darwaze pe ek dard saja rakkha hai

ghar ke mahaul ko rangin banane ke liye

raushni jis ki sitaron ka jigar chaak kare

ek diya aisa jalana hai zamane ke liye

KHun mahke to kabhi dard ki bunden Tapken

sher ek chahiye 'ajmal' ke fasane ke liye