dasht-e-pur-haul mein ye kis ki sada gunjti hai

dasht-e-pur-haul meñ ye kis kī sadā gūñjtī hai

ḳhauf-o-dahshat se yahāñ saarī fazā gūñjtī hai

kaisā sannāTā hai is ālam-e-āb-o-gil meñ

ab kahīñ maiñ huuñ na ab merī sadā gūñjtī hai

dil meñ jitne bhī the hangāme subuk-dosh hue

mere atrāf meñ ḳhāmosh balā gūñjtī hai

koī āvāz sunā.ī nahīñ detī yā-rab

terī sargoshī magar mujh meñ sadā gūñjtī hai

sīna-e-gul se ubalte haiñ lahū ke dhāre

ab havāoñ meñ kahāñ bol vafā gūñjtī hai

har taraf ḳhauf ke mañDlāne lage haiñ bādal

bahr-e-zulmāt se yuuñ mauj-e-fazā gūñjtī hai

kyā ḳhabar bāb-e-asar ho ki na ho vā ai 'shams'

sar-e-aflāk magar merī duā gūñjtī hai

dasht-e-pur-haul mein ye kis ki sada gunjti hai

KHauf-o-dahshat se yahan sari faza gunjti hai

kaisa sannaTa hai is aalam-e-ab-o-gil mein

ab kahin main hun na ab meri sada gunjti hai

dil mein jitne bhi the hangame subuk-dosh hue

mere atraf mein KHamosh bala gunjti hai

koi aawaz sunai nahin deti ya-rab

teri sargoshi magar mujh mein sada gunjti hai

sina-e-gul se ubalte hain lahu ke dhaare

ab hawaon mein kahan bol wafa gunjti hai

har taraf KHauf ke manDlane lage hain baadal

bahr-e-zulmat se yun mauj-e-faza gunjti hai

kya KHabar bab-e-asar ho ki na ho wa ai 'shams'

sar-e-aflak magar meri dua gunjti hai