dasht-e-tanhai mein jalne ki saza jaane hai

dasht-e-tanhā.ī meñ jalne kī sazā jaane hai

kyā hai bartāv havāoñ kā diyā jaane hai

maiñ use dil ke dhaḌakne kā sabab kahtā huuñ

aur ik vo ki mujhe ḳhud se judā jaane hai

be-zamīroñ kā bhī jiinā koī jiinā hai ki bas

lazzat-e-zīst to pāband-e-anā jaane hai

maiñ ik āsūda-e-ġham huuñ sar-e-rāh-e-hastī

juz mire kaif-e-alam kaun bhalā jaane hai

tum jo is raah se guzroge to mil jā.ūñgā

merī manzil mirā naqsh-e-kaf-e-pā jaane hai

ahl-e-dānish ko kahāñ ḳhanda-labī kī mohlat

sirf dīvāna hī ye tarz-o-adā jaane hai

mujh pe kyā guzrī hai āḳhir shab-e-hijrāñ meñ 'ḳhatīb'

merā dil jaane hai yā merā ḳhudā jaane hai

dasht-e-tanhai mein jalne ki saza jaane hai

kya hai bartaw hawaon ka diya jaane hai

main use dil ke dhaDakne ka sabab kahta hun

aur ek wo ki mujhe KHud se juda jaane hai

be-zamiron ka bhi jina koi jina hai ki bas

lazzat-e-zist to paband-e-ana jaane hai

main ek aasuda-e-gham hun sar-e-rah-e-hasti

juz mere kaif-e-alam kaun bhala jaane hai

tum jo is rah se guzroge to mil jaunga

meri manzil mera naqsh-e-kaf-e-pa jaane hai

ahl-e-danish ko kahan KHanda-labi ki mohlat

sirf diwana hi ye tarz-o-ada jaane hai

mujh pe kya guzri hai aaKHir shab-e-hijran mein 'KHatib'

mera dil jaane hai ya mera KHuda jaane hai