dasht-e-ulfat mein bhaTakta hua aahu tu hai

dasht-e-ulfat meñ bhaTaktā huā aahū tū hai

maiñ huuñ raihān-e-mohabbat mirī ḳhushbū tū hai

dhuup meñ mere liye sard havā kā jhoñkā

aur rātoñ meñ chamaktā huā jugnū tū hai

ġham-e-dil kā koī 'unvān nahīñ ho saktā

is fasāne kā jo raushan hai vo pahlū tū hai

tū ne baḳhshā hai har ik chiiz ko paikar yā-rab

rakhne vaalā bhī har ik chiiz pe qaabū tū hai

mujh ko hai terī karīmī pe bharosa yā-rab

merā ḳhāliq mirā aaqā mirā shāhū tū hai

terī ye shān-e-hama-gīrī koī kyā samjhe

'arsh pe jalva-fagan farsh pe har-sū tū hai

maġhribī shor-sharābe haiñ añdhere 'dā.em'

ahl-e-mausīqī hai sangīt kā jugnū tū hai

dasht-e-ulfat mein bhaTakta hua aahu tu hai

main hun raihan-e-mohabbat meri KHushbu tu hai

dhup mein mere liye sard hawa ka jhonka

aur raaton mein chamakta hua jugnu tu hai

gham-e-dil ka koi 'unwan nahin ho sakta

is fasane ka jo raushan hai wo pahlu tu hai

tu ne baKHsha hai har ek chiz ko paikar ya-rab

rakhne wala bhi har ek chiz pe qabu tu hai

mujh ko hai teri karimi pe bharosa ya-rab

mera KHaliq mera aaqa mera shahu tu hai

teri ye shan-e-hama-giri koi kya samjhe

'arsh pe jalwa-fagan farsh pe har-su tu hai

maghribi shor-sharabe hain andhere 'daem'

ahl-e-mausiqi hai sangit ka jugnu tu hai