dasht hain nauha-kunan shahr ki virani par

dasht haiñ nauha-kunāñ shahr kī vīrānī par

kis ne is shahr kī buniyād rakhī paanī par

ik sharar bhed ke mānind chhupā hai dil meñ

ek vo ranj ki zāhir nahīñ peshānī par

habs kī rut meñ chale saañs ġhanīmat samjho

nuur kī ek kiran chāñd hai zindānī par

kaun jaane ki ye asrār khuleñge kaise

koī ranjūr na ho be-sar-o-sāmānī par

tīrgī aur baḌhī jaatī hai rafta rafta

aaj kyoñ raat kamar-basta hai uryānī par

jism kī had se pare koī khaḌā sochtā hai

kaise ab ret kī dīvār bane paanī par

āsmāñ terī lahad khod rahā hai koī

ab zamīñ aur kise laa.e nigahbānī par

is fusūñ-kār mohabbat meñ yahī hotā hai

hoñT ḳhāmosh raheñ aañkh ho tuġhyānī par

dasht hain nauha-kunan shahr ki virani par

kis ne is shahr ki buniyaad rakhi pani par

ek sharar bhed ke manind chhupa hai dil mein

ek wo ranj ki zahir nahin peshani par

habs ki rut mein chale sans ghanimat samjho

nur ki ek kiran chand hai zindani par

kaun jaane ki ye asrar khulenge kaise

koi ranjur na ho be-sar-o-samani par

tirgi aur baDhi jati hai rafta rafta

aaj kyon raat kamar-basta hai uryani par

jism ki had se pare koi khaDa sochta hai

kaise ab ret ki diwar bane pani par

aasman teri lahad khod raha hai koi

ab zamin aur kise lae nigahbani par

is fusun-kar mohabbat mein yahi hota hai

honT KHamosh rahen aankh ho tughyani par