دشت کے دشت اشکوں سے تر ہو گئے

دشت کے دشت اشکوں سے تر ہو گئے

سارے ذرات لعل و گہر ہو گئے

سائباں تھے مگر مل نہ پائے ہمیں

عمر کی راہ پر در بہ در ہو گئے

حادثہ یہ ہوا ہم چلے تو مگر

آپ تک آتے آتے خبر ہو گئے

جانے کیا کر دیا اک نظر نے تری

میرے جذبات زیر و زبر ہو گئے

صبر سے میرے ہارا ترا ظلم پھر

دیکھ صیاد پھر بال و پر ہو گئے

اپنے دو چار لمحے بنے داستاں

پھر فسانے سبھی مختصر ہو گئے

میں نے چپکے سے دم کیں دعائیں مگر

وہ شفا پا گئے مشتہر ہو گئے

اس کے قدموں کا یوں جھک کے بوسہ لیا

خاک پا ہم سر رہ گزر ہو گئے

آپ کوثرؔ کی آنکھوں کا تارہ ہوئے

دل میں ابھرے تو رشک قمر ہو گئے