dasht ke dasht ashkon se tar ho gae

dasht ke dasht ashkoñ se tar ho ga.e

saare zarrāt la.al-o-gohar ho ga.e

sā.ebāñ the magar mil na paa.e hameñ

umr kī raah par dar-ba-dar ho ga.e

hādisa ye huā ham chale to magar

aap tak aate aate ḳhabar ho ga.e

jaane kyā kar diyā ik nazar ne tirī

mere jazbāt zer-o-zabar ho ga.e

sabr se mere haarā tirā zulm phir

dekh sayyād phir bāl-o-par ho ga.e

apne do chaar lamhe bane dāstāñ

phir fasāne sabhī muḳhtasar ho ga.e

maiñ ne chupke se dam kiiñ duā.eñ magar

vo shifā pā ga.e mushtahar ho ga.e

us ke qadmoñ kā yuuñ jhuk ke bosa liyā

ḳhāk-e-pā ham sar-e-rahguzar ho ga.e

aap 'kausar' kī āñkhoñ kā taara hue

dil meñ ubhre to rashk-e-qamar ho ga.e

dasht ke dasht ashkon se tar ho gae

sare zarraat lal-o-gohar ho gae

saeban the magar mil na pae hamein

umr ki rah par dar-ba-dar ho gae

hadisa ye hua hum chale to magar

aap tak aate aate KHabar ho gae

jaane kya kar diya ek nazar ne teri

mere jazbaat zer-o-zabar ho gae

sabr se mere haara tera zulm phir

dekh sayyaad phir baal-o-par ho gae

apne do chaar lamhe bane dastan

phir fasane sabhi muKHtasar ho gae

main ne chupke se dam kin duaen magar

wo shifa pa gae mushtahar ho gae

us ke qadmon ka yun jhuk ke bosa liya

KHak-e-pa hum sar-e-rahguzar ho gae

aap 'kausar' ki aankhon ka tara hue

dil mein ubhre to rashk-e-qamar ho gae