dasht mein khoe huon ke to nishan milte hain

dasht meñ kho.e huoñ ke to nishāñ milte haiñ

jo magar ghar meñ bhaTak jaa.eñ kahāñ milte haiñ

ye jo hoñToñ pe musallat hai ḳhamoshī kyoñ hai

ham to sunte the yahāñ ahl-e-zabāñ milte haiñ

pūchhte phirte haiñ kuchh din se ka.ī ahl-e-visāl

hijr ke maare hue log kahāñ milte haiñ

ham jo dar-ba-darī pe maa.il haiñ kahāñ jaa.eñ bhalā

ham ko to ḳhvāb meñ bhī sahn-o-makāñ milte haiñ

ek saaya hai jo rahtā hai kam-az-kam tā-shām

varna is dasht meñ ham-rāh kahāñ milte haiñ

haa.e vo log jo ḳhushbū kī tarah hote the

DhūñDhne se bhī havāoñ meñ kahāñ milte haiñ

chand pyāsoñ kī qanā'at kā thā zimma ham par

ye jo ham barf-badan āb-e-ravāñ milte haiñ

vo yaqīnan isī raste hī se guzrā hogā

us kī ḳhushbū ke havāoñ meñ nishāñ milte haiñ

dasht mein khoe huon ke to nishan milte hain

jo magar ghar mein bhaTak jaen kahan milte hain

ye jo honTon pe musallat hai KHamoshi kyon hai

hum to sunte the yahan ahl-e-zaban milte hain

puchhte phirte hain kuchh din se kai ahl-e-visal

hijr ke mare hue log kahan milte hain

hum jo dar-ba-dari pe mail hain kahan jaen bhala

hum ko to KHwab mein bhi sahn-o-makan milte hain

ek saya hai jo rahta hai kam-az-kam ta-sham

warna is dasht mein ham-rah kahan milte hain

hae wo log jo KHushbu ki tarah hote the

DhunDhne se bhi hawaon mein kahan milte hain

chand pyason ki qana'at ka tha zimma hum par

ye jo hum barf-badan aab-e-rawan milte hain

wo yaqinan isi raste hi se guzra hoga

us ki KHushbu ke hawaon mein nishan milte hain