dasht mein wadi-e-shadab ko chhu kar aaya

dasht meñ vādi-e-shādāb ko chhū kar aayā

maiñ khulī-āñkh hasīñ ḳhvāb ko chhū kar aayā

us ko chhū kar mujhe mahsūs huā hai aise

jaise maiñ resham-o-kim-ḳhvāb ko chhū kar aayā

mujh ko mālūm hai poroñ ke damakne kā javāz

raat maiñ ḳhvāb meñ mahtāb ko chhū kar aayā

jism ke saath mirī ruuh bhī nam hone lagī

jab se us dīda-e-pur-āb ko chhū kar aayā

ruuh kī kaa.ī isī taur se chhaTnā thī so maiñ

sub.h-dam mimbar-o-mehrāb ko chhū kar aayā

murta.ish kirnoñ kā raqs ek ghaḌī bhī na thame

chāñd kis tarz ke tālāb ko chhū kar aayā

dasht mein wadi-e-shadab ko chhu kar aaya

main khuli-ankh hasin KHwab ko chhu kar aaya

us ko chhu kar mujhe mahsus hua hai aise

jaise main resham-o-kim-KHwab ko chhu kar aaya

mujh ko malum hai poron ke damakne ka jawaz

raat main KHwab mein mahtab ko chhu kar aaya

jism ke sath meri ruh bhi nam hone lagi

jab se us dida-e-pur-ab ko chhu kar aaya

ruh ki kai isi taur se chhaTna thi so main

subh-dam mimbar-o-mehrab ko chhu kar aaya

murtaish kirnon ka raqs ek ghaDi bhi na thame

chand kis tarz ke talab ko chhu kar aaya