دشت و صحرا کو بھی وہ منظر سہانے دے گیا

دشت و صحرا کو بھی وہ منظر سہانے دے گیا

اور زباں پر پتھروں کی وہ ترانے دے گیا

مسخ ہونے لگ گئے احساس کے چہرے تمام

دھوپ کے جلتے ہوئے وہ آشیانے دے گیا

دام پھیلائے گا کل اپنی ہوس کا بالیقیں

آج تو وہ اے پرندے چند دانے دے گیا

دیکھتے ہیں تیرے گیتوں میں ترا چہرہ سبھی

دل بہل جائیں گے جن سے وہ بہانے دے گیا

وہ رہا مسرور محفل میں چراغوں کی مگر

ناز ہم کو ان اندھیروں کے اٹھانے دے گیا

خوں چکاں منظر دیا اور زہر کا دریا دیا

اپنی تقریروں میں شعلوں کے فسانے دے گیا

شکریہ صد شکریہ اے شاعر بسمل کہ تو

درد سے معمور غزلیں گنگنانے دے گیا

اس سے بڑھ کر اور کیا سوغات ہوگی اے قمرؔ

زخم دل درد و خلش کتنے خزانے دے گیا