dasht-o-sahra ko bhi wo manzar suhane de gaya

dasht-o-sahrā ko bhī vo manzar suhāne de gayā

aur zabāñ par pattharoñ kī vo tarāne de gayā

masḳh hone lag ga.e ehsās ke chehre tamām

dhuup ke jalte hue vo āshiyāne de gayā

daam phailā.egā kal apnī havas kā bil-yaqīñ

aaj to vo ai parinde chand daane de gayā

dekhte haiñ tere gītoñ meñ tirā chehra sabhī

dil bahal jā.eñge jin se vo bahāne de gayā

vo rahā masrūr mahfil meñ charāġhoñ kī magar

naaz ham ko in añdheroñ ke uThāne de gayā

ḳhūñ-chakāñ manzar diyā aur zahr kā dariyā diyā

apnī taqrīroñ meñ sho.aloñ ke fasāne de gayā

shukriya sad-shukriya ai shā.ir-e-bismil ki tū

dard se māmūr ġhazleñ gungunāne de gayā

is se baḌh kar aur kyā sauġhāt hogī ai 'qamar'

zaḳhm-e-dil dard-o-ḳhalish kitne ḳhazāne de gayā

dasht-o-sahra ko bhi wo manzar suhane de gaya

aur zaban par pattharon ki wo tarane de gaya

masKH hone lag gae ehsas ke chehre tamam

dhup ke jalte hue wo aashiyane de gaya

dam phailaega kal apni hawas ka bil-yaqin

aaj to wo ai parinde chand dane de gaya

dekhte hain tere giton mein tera chehra sabhi

dil bahal jaenge jin se wo bahane de gaya

wo raha masrur mahfil mein charaghon ki magar

naz hum ko in andheron ke uThane de gaya

KHun-chakan manzar diya aur zahr ka dariya diya

apni taqriron mein shoalon ke fasane de gaya

shukriya sad-shukriya ai shair-e-bismil ki tu

dard se mamur ghazlen gungunane de gaya

is se baDh kar aur kya saughat hogi ai 'qamar'

zaKHm-e-dil dard-o-KHalish kitne KHazane de gaya