dasht-paimai ka gar qasd mukarrar hoga

dasht-paimā.ī kā gar qasd mukarrar hogā

har sar-e-ḳhār pa.e-ābla nashtar hogā

mai-kade se tirā dīvāna jo bāhar hogā

ek meñ shīsha aur ik haath meñ sāġhar hogā

halqa-e-chashm-e-sanam likh ke ye kahtā hai qalam

bas ki markaz se qadam apnā na bāhar hogā

dil na denā kabhī in sañg-diloñ ko yaaro

chuur hovegā jo shīsha tah-e-patthar hogā

dekh letā vo agar ruḳh kī tajallī tere

aa.ina ḳhāna-e-māyūsī meñ shashdar hogā

chaak kar Dālūñgā dāmān-e-kafan vahshat se

āstīñ se na mirā haath jo bāhar hogā

ai 'rasā' jaisā hai bargashta zamāna ham se

aisā bargashta kisī kā na muqaddar hogā

dasht-paimai ka gar qasd mukarrar hoga

har sar-e-KHar pae-abla nashtar hoga

mai-kade se tera diwana jo bahar hoga

ek mein shisha aur ek hath mein saghar hoga

halqa-e-chashm-e-sanam likh ke ye kahta hai qalam

bas ki markaz se qadam apna na bahar hoga

dil na dena kabhi in sang-dilon ko yaro

chur howega jo shisha tah-e-patthar hoga

dekh leta wo agar ruKH ki tajalli tere

aaina KHana-e-mayusi mein shashdar hoga

chaak kar Dalunga daman-e-kafan wahshat se

aastin se na mera hath jo bahar hoga

ai 'rasa' jaisa hai bargashta zamana hum se

aisa bargashta kisi ka na muqaddar hoga