dast-bardar hua main bhi talabgari se

dast-bardār huā maiñ bhī talabgārī se

ab kahīñ jā ke ifāqa huā bīmārī se

ḳhaak meñ ḳhud ko milāyā to jaḌeñ paa.ī haiñ

kaise rokegā koī mujh ko numūdārī se

TuuT hī jaate haiñ iḳhlās ke putle āḳhir

so mujhe bach ke nikalnā hai adākārī se

ab bhī kuchh chīzeñ haiñ bāzār meñ jo aa.ī nahīñ

ab bhī munkir hai koī merī ḳharīdārī se

ham akahre kabhī bar-vaqt samajh paate nahīñ

kaam kar jaatā hai chup-chāp vo tahdārī se

dil-e-nādān ulaT detā hai aksar ye bisāt

'aql yuuñ chaal bahut chaltī hai ayyārī se

jab achānak hī har ik faisla honā hai yahāñ

mujh ko bhī koī 'ilāqa nahīñ tayyārī se

saḳht-jānī ke mile kitne hī e'zāz mujhe

aur miltā bhī kyā ummīd kī be-zārī se

jaltā uupar se huuñ andar se nikhartā huuñ 'suhail'

ḳhud ko yuuñ aag lagātā huuñ maiñ fankārī se

dast-bardar hua main bhi talabgari se

ab kahin ja ke ifaqa hua bimari se

KHak mein KHud ko milaya to jaDen pai hain

kaise rokega koi mujh ko numudari se

TuT hi jate hain iKHlas ke putle aaKHir

so mujhe bach ke nikalna hai adakari se

ab bhi kuchh chizen hain bazar mein jo aai nahin

ab bhi munkir hai koi meri KHaridari se

hum akahre kabhi bar-waqt samajh pate nahin

kaam kar jata hai chup-chap wo tahdari se

dil-e-nadan ulaT deta hai aksar ye bisat

'aql yun chaal bahut chalti hai ayyari se

jab achanak hi har ek faisla hona hai yahan

mujh ko bhi koi 'ilaqa nahin tayyari se

saKHt-jaani ke mile kitne hi e'zaz mujhe

aur milta bhi kya ummid ki be-zari se

jalta upar se hun andar se nikharta hun 'suhail'

KHud ko yun aag lagata hun main fankari se