dast-e-daman dua rahe na rahe

dast-e-dāman du'ā rahe na rahe

ham chale ab vafā rahe na rahe

maiñ fanā kī Dagar pe huuñ yaaro

ab kisī kī sazā rahe na rahe

aa.ine tum to mere saath raho

mujh meñ chāhe adā rahe na rahe

jalnā qismat meñ hai to jalnā hai

chhat pe koī ghaTā rahe na rahe

paañv nañge haiñ har tamannā ke

sar pe ab ke ridā rahe na rahe

ho ga.ī jo ḳhatā to ab ke baras

mujh meñ koī ḳhatā rahe na rahe

jal ga.ī baaġh kī umīdeñ bhī

ab guloñ meñ fazā rahe na rahe

mere zaḳhmoñ ke dast-e-dāman meñ

dard kī ab davā rahe na rahe

bujh ga.e diip sab vafāoñ ke

sahn meñ ab havā rahe na rahe

farq paḌtā hai kyā bhalā mujh ko

us ke dil meñ daġhā rahe na rahe

alamiye ḳhuub ham ne jhele haiñ

Dar nahīñ alamiya rahe na rahe

girya-o-ġham ke aa.ine meñ haiñ

'aks meñ ab azā rahe na rahe

mere pahlū se aag hai lipTī

sar pe bād-e-sabā rahe na rahe

lab khule haiñ to kuchh suno pal-bhar

kyuuñ ke phir ye gilā rahe na rahe

ab na lauTeñge phir kabhī 'mariyam'

mere pīchhe sadā rahe na rahe

dast-e-daman du'a rahe na rahe

hum chale ab wafa rahe na rahe

main fana ki Dagar pe hun yaro

ab kisi ki saza rahe na rahe

aaine tum to mere sath raho

mujh mein chahe ada rahe na rahe

jalna qismat mein hai to jalna hai

chhat pe koi ghaTa rahe na rahe

panw nange hain har tamanna ke

sar pe ab ke rida rahe na rahe

ho gai jo KHata to ab ke baras

mujh mein koi KHata rahe na rahe

jal gai bagh ki umiden bhi

ab gulon mein faza rahe na rahe

mere zaKHmon ke dast-e-daman mein

dard ki ab dawa rahe na rahe

bujh gae dip sab wafaon ke

sahn mein ab hawa rahe na rahe

farq paDta hai kya bhala mujh ko

us ke dil mein dagha rahe na rahe

alamiye KHub hum ne jhele hain

Dar nahin alamiya rahe na rahe

girya-o-gham ke aaine mein hain

'aks mein ab aza rahe na rahe

mere pahlu se aag hai lipTi

sar pe baad-e-saba rahe na rahe

lab khule hain to kuchh suno pal-bhar

kyun ke phir ye gila rahe na rahe

ab na lauTenge phir kabhi 'mariyam'

mere pichhe sada rahe na rahe