dast-e-hawas se naqd-e-dil-o-jaan bachaiye

dast-e-havas se naqd-e-dil-o-jāñ bachā.iye

ye hai amānat-e-ġham-e-jānāñ bachā.iye

jal jaa.eñ ḳhvāb bhī na kahīñ husn-o-ishq ke

sho.ale lapak rahe haiñ shabistāñ bachā.iye

ahl-e-ḳhirad ne aag lagā.ī hai har taraf

gulshan bachā.iye ki bayābāñ bachā.iye

ahl-e-havas ke haath meñ bhī jaam aa gayā

ab ābrū-e-azmat-e-rindāñ bachā.iye

hangāma-e-hayāt meñ ye kis ko hosh hai

dāman bachā.iye ki garebāñ bachā.iye

har-sū fazā-e-zīst pe chhāyā ġhubār-e-ġham

kyūñkar 'payām' gesū-e-jānāñ bachā.iye

dast-e-hawas se naqd-e-dil-o-jaan bachaiye

ye hai amanat-e-gham-e-jaanan bachaiye

jal jaen KHwab bhi na kahin husn-o-ishq ke

shoale lapak rahe hain shabistan bachaiye

ahl-e-KHirad ne aag lagai hai har taraf

gulshan bachaiye ki bayaban bachaiye

ahl-e-hawas ke hath mein bhi jam aa gaya

ab aabru-e-azmat-e-rindan bachaiye

hangama-e-hayat mein ye kis ko hosh hai

daman bachaiye ki gareban bachaiye

har-su faza-e-zist pe chhaya ghubar-e-gham

kyunkar 'payam' gesu-e-jaanan bachaiye