dast-e-junun ne mujhko pareshan bana diya

dast-e-junūñ ne mujh ko pareshāñ banā diyā

jo chiiz haath aa.ī garebāñ banā diyā

āḳhir mire junūn-e-salīqa-shi'ār ne

kāñTe ko phuul gul ko gulistāñ banā diyā

ai husn-e-lā-yazāl ye afzāl the tire

jo zauq-e-‘ishq ne mujhe insāñ banā diyā

tū ai ḳhayāl-e-gul sad-o-sī-sāl zindābād

tū ne mire qafas ko gulistāñ banā diyā

husn-e-tajalliyāt ne andāz-e-ḳhās se

ā.īna-e-ḳhayāl ko hairāñ banā diyā

khīñche vo bel-būTe utāre vo phuul phal

dāman ko ashk-e-ḳhūñ ne gulistāñ banā diyā

dil ko hamāre vahshat-e-'āshiq-navāz ne

sarmāya-e-ḳhayāl-e-pareshāñ banā diyā

phūle phale nihāl-e-hayāt us kā ai ḳhudā

jis ne mirī lahad ko gulistāñ banā diyā

aa aa ke 'qadr' zulf-e-pareshāñ kī yaad ne

apne karam se mujh ko pareshāñ banā diyā

dast-e-junun ne mujh ko pareshan bana diya

jo chiz hath aai gareban bana diya

aaKHir mere junun-e-saliqa-shi'ar ne

kanTe ko phul gul ko gulistan bana diya

ai husn-e-la-yazal ye afzal the tere

jo zauq-e-‘ishq ne mujhe insan bana diya

tu ai KHayal-e-gul sad-o-si-sal zindabaad

tu ne mere qafas ko gulistan bana diya

husn-e-tajalliyat ne andaz-e-KHas se

aaina-e-KHayal ko hairan bana diya

khinche wo bel-buTe utare wo phul phal

daman ko ashk-e-KHun ne gulistan bana diya

dil ko hamare wahshat-e-'ashiq-nawaz ne

sarmaya-e-KHayal-e-pareshan bana diya

phule phale nihaal-e-hayat us ka ai KHuda

jis ne meri lahad ko gulistan bana diya

aa aa ke 'qadr' zulf-e-pareshan ki yaad ne

apne karam se mujh ko pareshan bana diya