dast-e-nazuk se jo parde ko sanwara tumne

dast-e-nāzuk se jo parde ko sañvārā tum ne

maiñ ye samjhā ki navāzish se pukārā tum ne

kyā haqīqat meñ ġham-e-ishq se mānūs hue

yā yuuñ hī pūchh liyā haal hamārā tum ne

mere maktūb-e-mohabbat mujhe vāpas de kar

kar lī to hai ye mohabbat bhī gavārā tum ne

nsibatan aaj hijāboñ meñ izāfa kaisā

ġhāliban jaan liyā dil kā ishārā tum ne

daur-e-māzī ke hasīñ giit sunā kar aksar

aur bhī dard-e-mohabbat ko nikhārā tum ne

rafta rafta na bhaḌak jaa.e vo sho.ala ban kar

rakh diyā hai jo mire dil meñ sharāra tum ne

haif-sad-haif ki duniyā-e-tarab meñ kho kar

kar liyā dard ke māroñ se kinārā tum ne

ashk kahte haiñ ki paḌh paḌh ke 'jalī' kī ġhazleñ

dil meñ mahsūs kiyā dard kā dhārā tum ne

dast-e-nazuk se jo parde ko sanwara tum ne

main ye samjha ki nawazish se pukara tum ne

kya haqiqat mein gham-e-ishq se manus hue

ya yun hi puchh liya haal hamara tum ne

mere maktub-e-mohabbat mujhe wapas de kar

kar li to hai ye mohabbat bhi gawara tum ne

nsibatan aaj hijabon mein izafa kaisa

ghaaliban jaan liya dil ka ishaara tum ne

daur-e-mazi ke hasin git suna kar aksar

aur bhi dard-e-mohabbat ko nikhaara tum ne

rafta rafta na bhaDak jae wo shoala ban kar

rakh diya hai jo mere dil mein sharara tum ne

haif-sad-haif ki duniya-e-tarab mein kho kar

kar liya dard ke maron se kinara tum ne

ashk kahte hain ki paDh paDh ke 'jali' ki ghazlen

dil mein mahsus kiya dard ka dhaara tum ne