dast-e-zaruriyat mein baTta chala gaya

dast-e-zarūriyāt meñ baTtā chalā gayā

maiñ be-panāh shaḳhs thā ghaTtā chalā gayā

pīchhe haTā maiñ rāsta dene ke vāste

phir yuuñ huā ki raah se haTtā chalā gayā

ujlat thī is qadar ki maiñ kuchh bhī paḌhe baġhair

aurāq zindagī ke palaTtā chalā gayā

jitnī ziyāda āgahī baḌhtī ga.ī mirī

utnā darūn-e-zāt simaTtā chalā gayā

kuchh dhuup zindagī kī bhī baḌhtī chalī ga.ī

aur kuchh ḳhayāl-e-yār bhī chhaTtā chalā gayā

ujḌe hue makān meñ kal shab tirā ḳhayāl

aaseb ban ke mujh se lipaTtā chalā gayā

us se ta'alluqāt baḌhāne kī chaah meñ

'fahmī' maiñ apne-āp se kaTtā chalā gayā

dast-e-zaruriyat mein baTta chala gaya

main be-panah shaKHs tha ghaTta chala gaya

pichhe haTa main rasta dene ke waste

phir yun hua ki rah se haTta chala gaya

ujlat thi is qadar ki main kuchh bhi paDhe baghair

auraq zindagi ke palaTta chala gaya

jitni ziyaada aagahi baDhti gai meri

utna darun-e-zat simaTta chala gaya

kuchh dhup zindagi ki bhi baDhti chali gai

aur kuchh KHayal-e-yar bhi chhaTta chala gaya

ujDe hue makan mein kal shab tera KHayal

aaseb ban ke mujh se lipaTta chala gaya

us se ta'alluqat baDhane ki chah mein

'fahmi' main apne-ap se kaTta chala gaya