dastan-e-shama thi ya qissa-e-parwana tha

dastān-e-sham.a thī yā qissa-e-parvāna thā

anjuman meñ ishq hī unvān har afsāna thā

justajū-e-dair-o-ka.aba se huā zāhir yahī

maiñ haqīqat meñ ḳhud apnī zaat se begāna thā

merī hastī thī ba-zāt-e-ḳhud mukammal mai-kada

maiñ kabhī shīsha kabhī sāġhar kabhī paimāna thā

haa.e vo ayyām-e-tiflī haa.e vo ahd-e-shabāb

ḳhvāb thā jo kuchh ki dekhā jo sunā afsāna thā

bad-gumānī se huā apne parā.e kā gumāñ

varna apnā thā na duniyā meñ koī begāna thā

chashm-e-bīnā hī na thī terī vagarna ai kalīm

zarre zarre meñ zuhūr-e-jalva-e-jānāna thā

mahfil-e-hastī meñ dekhā hai yahī ham ne 'jalīs'

jis ko jitnā hosh thā utnā hī vo dīvāna thā

dastan-e-shama thi ya qissa-e-parwana tha

anjuman mein ishq hi unwan har afsana tha

justaju-e-dair-o-kaba se hua zahir yahi

main haqiqat mein KHud apni zat se begana tha

meri hasti thi ba-zat-e-KHud mukammal mai-kada

main kabhi shisha kabhi saghar kabhi paimana tha

hae wo ayyam-e-tifli hae wo ahd-e-shabab

KHwab tha jo kuchh ki dekha jo suna afsana tha

bad-gumani se hua apne parae ka guman

warna apna tha na duniya mein koi begana tha

chashm-e-bina hi na thi teri wagarna ai kalim

zarre zarre mein zuhur-e-jalwa-e-jaanana tha

mahfil-e-hasti mein dekha hai yahi hum ne 'jalis'

jis ko jitna hosh tha utna hi wo diwana tha