dastak hawa ne di hai zara ghaur se suno

dastak havā ne dī hai zarā ġhaur se suno

tūfāñ kī aa rahī hai sadā ġhaur se suno

shāḳheñ uThā ke haath duā māñgne lagīñ

sargoshiyāñ chaman meñ haiñ kyā ġhaur se suno

mahsūs kar rahā huuñ maiñ karb-e-shikastagī

tum bhī shaguft-e-gul kī sadā ġhaur se suno

gulcheñ ko dekh letī hai jab koī shāḳh-e-gul

detī hai bad-duā ki duā ġhaur se suno

ye aur baat ḳhushk haiñ āñkheñ magar kahīñ

khul kar baras rahī hai ghaTā ġhaur se suno

shāḳhoñ se TūTte hue pattoñ ko dekh kar

rotī hai muñh chhupā ke havā ġhaur se suno

ye dasht-e-be-karāñ ye pur-asrār ḳhāmushī

aur duur ik sadā.e zarā ġhaur se suno

ye bāz-gasht merī sadā kī hai yā mujhe

āvāz de rahā hai ḳhudā ġhaur se suno

baḌhtī chalī hai arz-o-samā meñ kashīdgī

kaunain meñ hai hashr bapā ġhaur se suno

kab tak zamīñ uThā.e rahe āsmāñ kā bojh

ab TūTtī hai rasm-e-vafā ġhaur se suno

maiñ TūTtā huuñ ḳhair mujhe TūTnā hī hai

dhartī chaTaḳh rahī hai zarā ġhaur se suno

sahrā meñ chīḳhte haiñ bagūle to shahr shahr

ik shor hai sukūt-fazā ġhaur se suno

'shā.ir' tarāshte to ho dil meñ ḳhudā kā but

āvāza-e-shikast-e-anā ġhaur se suno

dastak hawa ne di hai zara ghaur se suno

tufan ki aa rahi hai sada ghaur se suno

shaKHen uTha ke hath dua mangne lagin

sargoshiyan chaman mein hain kya ghaur se suno

mahsus kar raha hun main karb-e-shikastagi

tum bhi shaguft-e-gul ki sada ghaur se suno

gulchen ko dekh leti hai jab koi shaKH-e-gul

deti hai bad-dua ki dua ghaur se suno

ye aur baat KHushk hain aankhen magar kahin

khul kar baras rahi hai ghaTa ghaur se suno

shaKHon se TuTte hue patton ko dekh kar

roti hai munh chhupa ke hawa ghaur se suno

ye dasht-e-be-karan ye pur-asrar KHamushi

aur dur ek sadae zara ghaur se suno

ye baz-gasht meri sada ki hai ya mujhe

aawaz de raha hai KHuda ghaur se suno

baDhti chali hai arz-o-sama mein kashidgi

kaunain mein hai hashr bapa ghaur se suno

kab tak zamin uThae rahe aasman ka bojh

ab TuTti hai rasm-e-wafa ghaur se suno

main TuTta hun KHair mujhe TuTna hi hai

dharti chaTaKH rahi hai zara ghaur se suno

sahra mein chiKHte hain bagule to shahr shahr

ek shor hai sukut-faza ghaur se suno

'shair' tarashte to ho dil mein KHuda ka but

aawaza-e-shikast-e-ana ghaur se suno