dastiyab usko hua jab se hai gul-dasta-e-dagh

dastiyāb us ko huā jab se hai gul-dasta-e-dāġh

bulbul-e-dil kā nahīñ miltā hai zinhār dimāġh

halqa-e-zulf se us kī jo ayaañ haiñ aariz

shab-e-tārīk meñ goyā ki farozāñ hai charāġh

gar faroġh-e-ruḳh-e-jānāna madad-farmā ho

ġham-e-kaunain se ho jaave vahīñ dil ko farāġh

fazl-e-īzad se mubārak rahe ai vā.iz-e-shahr

kūcha-e-yār hameñ aur tujhe firdaus kā baaġh

mast-e-ishq-e-shah-e-ḳhādim huuñ maiñ 'āsim' yaksar

jis ne baḳhshā hai mujhe bāda-e-irfāñ kā ayāġh

dastiyab us ko hua jab se hai gul-dasta-e-dagh

bulbul-e-dil ka nahin milta hai zinhaar dimagh

halqa-e-zulf se us ki jo ayan hain aariz

shab-e-tarik mein goya ki farozan hai charagh

gar farogh-e-ruKH-e-jaanana madad-farma ho

gham-e-kaunain se ho jawe wahin dil ko faragh

fazl-e-izad se mubarak rahe ai waiz-e-shahr

kucha-e-yar hamein aur tujhe firdaus ka bagh

mast-e-ishq-e-shah-e-KHadim hun main 'asim' yaksar

jis ne baKHsha hai mujhe baada-e-irfan ka ayagh