dastur tha jo gham ka purana badal gaya

dastūr thā jo ġham kā purānā badal gayā

sañbhle na the abhī ki zamāna badal gayā

shikva nahīñ ki sāġhar-o-mīnā badal ga.e

TuuTā ḳhumār kaif-e-shabāna badal gayā

jo baab the aham abhī hone the vo raqam

par kyā ki likhte likhte fasāna badal gayā

mashq-e-suḳhan vahī hai mashaqqat bhī hai vahī

kaise karūñ yaqīn zamāna badal gayā

naġhma-sarā haiñ ham to usī sur meñ lai meñ haiñ

par log kah rahe haiñ tarāna badal gayā

qaa.em purāne hīloñ bahānoñ pe aaj bhī

samjhe the is kā tarz bahāna badal gayā

merī thī kyā majāl haqīqat badal sakūñ

ḳhāke tah-e-ḳhayāl banānā badal gayā

'ādil' tujhe yaqīñ nahīñ aayā na aa.egā

terā vo yār-e-ġhār purānā badal gayā

dastur tha jo gham ka purana badal gaya

sanbhle na the abhi ki zamana badal gaya

shikwa nahin ki saghar-o-mina badal gae

TuTa KHumar kaif-e-shabana badal gaya

jo bab the aham abhi hone the wo raqam

par kya ki likhte likhte fasana badal gaya

mashq-e-suKHan wahi hai mashaqqat bhi hai wahi

kaise karun yaqin zamana badal gaya

naghma-sara hain hum to usi sur mein lai mein hain

par log kah rahe hain tarana badal gaya

qaem purane hilon bahanon pe aaj bhi

samjhe the is ka tarz bahana badal gaya

meri thi kya majal haqiqat badal sakun

KHake tah-e-KHayal banana badal gaya

'adil' tujhe yaqin nahin aaya na aaega

tera wo yar-e-ghaar purana badal gaya