daulat-e-dahr sab luTai hai

daulat-e-dahr sab luTā.ī hai

maiñ ne dil kī kamā.ī khaa.ī hai

ek lamhe ko tiir karne meñ

maiñ ne ik zindagī gañvā.ī hai

vo jo sarmāya-e-dil-o-jāñ thī

ab vahī aarzū parā.ī hai

tū hai āḳhir kahāñ ki aaj mujhe

be-tarah apnī yaad aa.ī hai

jān-e-jāñ tujh se dū-badū ho kar

maiñ ne ḳhud se shikast khaa.ī hai

ishq mere gumān meñ yārāñ

dil kī ik zor āzmā.ī hai

us meñ rah kar bhī maiñ nahīñ us meñ

jāniye dil meñ kyā samā.ī hai

mauj-e-bād-e-sabā pe ho ke savār

vo shamīm-e-ḳhayāl aa.ī hai

sharm kar tū ki dasht-e-hālat meñ

terī lailā ne ḳhaak uḌaa.ī hai

bik nahīñ pā rahā thā so maiñ ne

apnī qīmat bahut baḌhā.ī hai

vo jo thā 'jaun' vo kahīñ bhī na thā

husn ik ḳhvāb kī judā.ī hai

daulat-e-dahr sab luTai hai

main ne dil ki kamai khai hai

ek lamhe ko tir karne mein

main ne ek zindagi ganwai hai

wo jo sarmaya-e-dil-o-jaan thi

ab wahi aarzu parai hai

tu hai aaKHir kahan ki aaj mujhe

be-tarah apni yaad aai hai

jaan-e-jaan tujh se du-badu ho kar

main ne KHud se shikast khai hai

ishq mere guman mein yaran

dil ki ek zor aazmai hai

us mein rah kar bhi main nahin us mein

jaaniye dil mein kya samai hai

mauj-e-baad-e-saba pe ho ke sawar

wo shamim-e-KHayal aai hai

sharm kar tu ki dasht-e-haalat mein

teri laila ne KHak uDai hai

bik nahin pa raha tha so main ne

apni qimat bahut baDhai hai

wo jo tha 'jaun' wo kahin bhi na tha

husn ek KHwab ki judai hai