daulat-e-husn ki bhi hai kya luT

daulat-e-husn kī bhī hai kyā luuT

āñkhoñ ko paḌ ga.ī hai lūTā-lūT

chal rahī hai dilā havā-e-bahār

laala phūlā hai dāġh-e-saudā luuT

sāmne tere jo paḌe ai turk

us meñ ka.aba ho yā kalīsā luuT

chaar din hai bahār ai bulbul

zar-e-gul kā hazār toḌā luuT

saf-e-mizhgāñ se kah rahī hai vo chashm

dil mileñ jitne be-tahāshā luuT

sarf-e-allāh māl-e-duniyā kar

mard hai kuchh to bahr-e-uqbā luuT

saaf dil ho to jalva-gar ho yaar

aa.ina ho to ho tamāshā luuT

ne.amat-ḳhvān-e-husn jo mil jaa.e

ye samajh le hai mann-o-salvā luuT

gauhar-e-ābla hue to chale

leñge dīvāno ḳhār-e-sahrā luuT

jānte haiñ ki fauj-e-jañgī se

nahīñ sardār pher letā luuT

kaam mardoñ kā hai ye ai 'ātish'

rakhtī hai jaan kā bhī khaTkā luuT

daulat-e-husn ki bhi hai kya luT

aankhon ko paD gai hai luTa-luT

chal rahi hai dila hawa-e-bahaar

lala phula hai dagh-e-sauda luT

samne tere jo paDe ai turk

us mein kaba ho ya kalisa luT

chaar din hai bahaar ai bulbul

zar-e-gul ka hazar toDa luT

saf-e-mizhgan se kah rahi hai wo chashm

dil milen jitne be-tahasha luT

sarf-e-allah mal-e-duniya kar

mard hai kuchh to bahr-e-uqba luT

saf dil ho to jalwa-gar ho yar

aaina ho to ho tamasha luT

neamat-KHwan-e-husn jo mil jae

ye samajh le hai mann-o-salwa luT

gauhar-e-abla hue to chale

lenge diwano KHar-e-sahra luT

jaante hain ki fauj-e-jangi se

nahin sardar pher leta luT

kaam mardon ka hai ye ai 'atish'

rakhti hai jaan ka bhi khaTka luT