daulat shohrat qatl tabahi kya kya hain pahchan na puchh

daulat shohrat qatl tabāhī kyā kyā haiñ pahchān na pūchh

aaj vafā ke afsānoñ ke kitne haiñ unvān na pūchh

jhuuT daġhā, nafrat aur rishvat zehnoñ ke nīlām hue haiñ

aur tarāzū meñ sone ke tulte haiñ īmān na pūchh

jaltī chitāeñ ḳhūnī manzar, chīḳheñ, karb aur sannāTe

kis ko ham ilzām lagā.eñ bastī hai vīrān na pūchh

dard ke bādal chhā.e hue haiñ jaane kab ye baras paḌeñ

bhīgī bhīgī sī āñkheñ haiñ Thahrā hai tūfān na pūchh

taptā sūraj, ret kā dariyā, surḳh ujāle, kaalī raat

jaane kaise is dhartī par rahte haiñ insān na pūchh

jhulse chehre, zaḳhmī rūheñ, ḳhuun ke dhabbe, ġham ke daaġh

ā.īne meñ dekh ke sūrat duniyā hai hairān na pūchh

pyāse lab aur jalte ḳheme, tīr-o-ḳhanzar siine meñ

nasl-e-nau pe un ke 'ahsan' kitne haiñ ehsān na pūchh

daulat shohrat qatl tabahi kya kya hain pahchan na puchh

aaj wafa ke afsanon ke kitne hain unwan na puchh

jhuT dagha, nafrat aur rishwat zehnon ke nilam hue hain

aur taraazu mein sone ke tulte hain iman na puchh

jalti chitaen KHuni manzar, chiKHen, karb aur sannaTe

kis ko hum ilzam lagaen basti hai viran na puchh

dard ke baadal chhae hue hain jaane kab ye baras paDen

bhigi bhigi si aankhen hain Thahra hai tufan na puchh

tapta suraj, ret ka dariya, surKH ujale, kali raat

jaane kaise is dharti par rahte hain insan na puchh

jhulse chehre, zaKHmi ruhen, KHun ke dhabbe, gham ke dagh

aaine mein dekh ke surat duniya hai hairan na puchh

pyase lab aur jalte KHeme, tir-o-KHanzar sine mein

nasl-e-nau pe un ke 'ahsan' kitne hain ehsan na puchh