دور شباب ظلم و وفا یاد آ گیا

دور شباب ظلم و وفا یاد آ گیا

وہ جب بھی یاد آئے خدا یاد آ گیا

وہ سامنے رہے تو مجھے چپ سی لگ گئی

وہ جب گئے ہر ایک گلہ یاد آ گیا

جب دو نئے دلوں میں ہوئے کچھ معاہدے

مجھ کو بھی اپنا دور وفا یاد آ گیا

منصور و دار کا جو سنا میں نے واقعہ

مجھ کو تضاد جرم و سزا یاد آ گیا

نمناک ہو کے رہ گئی کیوں چشم مست ناز

کیا پھر کوئی خراب وفا یاد آ گیا

خورشید کو شفق کی فضاؤں میں دیکھ کر

دست حسیں پہ رنگ حنا یاد آ گیا

گزرا نظر سے جب کوئی برباد آرزو

موسیٰؔ کو چاہتوں کا مزا یاد آ گیا