daur saghar ka chale saqi dobara ek aur

daur sāġhar kā chale saaqī dobārā ek aur

abr kā'ba se uThā hai maan kahnā ek aur

jhūmtā aatā hai vo bādal kā TukḌā ek aur

sāqiyā bhar kar pilā de jām-e-sahbā ek aur

din ko jo kuchh tum ne dekhā ye to thī sab dil-lagī

shab ko rah jaao to dikhlā.eñ tamāshā ek aur

maiñ unheñ kahtā huuñ tum bedard ho nā-āshnā

vo lagāte haiñ mujhe ilzām ulTā ek aur

dil ko nafrat ho ga.ī nazroñ se āḳhir gir ga.e

tum se behtar apnī āñkhoñ meñ samāyā ek aur

kyuuñ sisaktā chhoḌe jaate ho mujhe maqtal meñ tum

faisla kar duuñ maiñ qurbāñ de ke charkā ek aur

tere aane meñ tavaqquf jab huā ai nāma-bar

ḳhat unheñ bechain ho kar ham ne likkhā ek aur

band mahram ke khule kuchh be-hijābī ho chukī

vo bhī ab uTh jaa.e jo baaqī hai pardā ek aur

dost dushman ho ga.e yāroñ ne āñkheñ pher liiñ

rah gayā hai aap kā mujh ko bharosā ek aur

vasl kī shab meñ kiyā murġh-e-sahar kā band-o-bast

na.ara-e-allāhu-akbar kā hai dhaḌkā ek aur

ho chukā zikr-e-dahan vasf-e-kamar likhte haiñ ham

daam meñ sayyād ke phañstā hai anqā ek aur

said kī kasrat se 'āġhā' ban paḌī sayyād kī

do ne gar paa.ī rihā.ī aa ke uljhā ek aur

daur saghar ka chale saqi dobara ek aur

abr ka'ba se uTha hai man kahna ek aur

jhumta aata hai wo baadal ka TukDa ek aur

saqiya bhar kar pila de jam-e-sahba ek aur

din ko jo kuchh tum ne dekha ye to thi sab dil-lagi

shab ko rah jao to dikhlaen tamasha ek aur

main unhen kahta hun tum bedard ho na-ashna

wo lagate hain mujhe ilzam ulTa ek aur

dil ko nafrat ho gai nazron se aaKHir gir gae

tum se behtar apni aankhon mein samaya ek aur

kyun sisakta chhoDe jate ho mujhe maqtal mein tum

faisla kar dun main qurban de ke charka ek aur

tere aane mein tawaqquf jab hua ai nama-bar

KHat unhen bechain ho kar hum ne likkha ek aur

band mahram ke khule kuchh be-hijabi ho chuki

wo bhi ab uTh jae jo baqi hai parda ek aur

dost dushman ho gae yaron ne aankhen pher lin

rah gaya hai aap ka mujh ko bharosa ek aur

wasl ki shab mein kiya murgh-e-sahar ka band-o-bast

nara-e-allahu-akbar ka hai dhaDka ek aur

ho chuka zikr-e-dahan wasf-e-kamar likhte hain hum

dam mein sayyaad ke phansta hai anqa ek aur

said ki kasrat se 'agha' ban paDi sayyaad ki

do ne gar pai rihai aa ke uljha ek aur