dayar-e-ahl-e-karam ka tawaf apni jagah

dayār-e-ahl-e-karam kā tavāf apnī jagah

ubhar rahā hai kahīñ inhirāf apnī jagah

basīrateñ to havā ke ḳhilāf chaltī haiñ

huā kare ye zamāna ḳhilāf apnī jagah

mirī kitāb kā bainassutūr hai kuchh aur

baḌā.iyoñ kā tirī e'tirāf apnī jagah

hasīn chehroñ kī be-chehragī hai ek taraf

nazar pe husn-e-nazar kā ġhilāf apnī jagah

hello kī hi kī tahzīb hai bulandī par

ḳhulūs-o-mehr kā girtā graph apnī jagah

vo roj T v pe taajā ḳhabar sunā.egā

sañbhāle baiThe raho shiin qaaf apnī jagah

unhī ko miltā hai e'zāz dūr-bīnī kā

jinheñ dikhā.ī na de saaf saaf apnī jagah

hayāt-o-maut haiñ aqdār-e-mushtarak fārūq

ḳhudā ke baab meñ har iḳhtilāf apnī jagah

dayar-e-ahl-e-karam ka tawaf apni jagah

ubhar raha hai kahin inhiraf apni jagah

basiraten to hawa ke KHilaf chalti hain

hua kare ye zamana KHilaf apni jagah

meri kitab ka bainassutur hai kuchh aur

baDaiyon ka teri e'tiraf apni jagah

hasin chehron ki be-chehragi hai ek taraf

nazar pe husn-e-nazar ka ghilaf apni jagah

hello ki hi ki tahzib hai bulandi par

KHulus-o-mehr ka girta graph apni jagah

wo roj T w pe taja KHabar sunaega

sanbhaale baiThe raho shin qaf apni jagah

unhi ko milta hai e'zaz dur-bini ka

jinhen dikhai na de saf saf apni jagah

hayat-o-maut hain aqdar-e-mushtarak faruq

KHuda ke bab mein har iKHtilaf apni jagah