dayar-e-dagh-o-beKHud shahr-e-dehli chhoD kar tujhko

dayār-e-'dāġh'-o-'beḳhud' shahr-e-dehlī chhoḌ kar tujh ko

na thā ma.alūm yuuñ ro.egā dil shām-o-sahar tujh ko

kahāñ milte haiñ duniyā ko kahāñ milte haiñ duniyā meñ

hue the jo atā ahl-e-suḳhan ahl-e-nazar tujh ko

tujhe markaz kahā jaatā thā duniyā kī nigāhoñ kā

mohabbat kī nazar se dekhte the sab nagar tujh ko

ba-qaul-e-'mīr' aurāq-e-musavvar the tire kūche

magar haa.e zamāne kī lagī kaisī nazar tujh ko

na bhūlegā hamārī dāstāñ tū bhī qayāmat tak

dilā.eñge hamārī yaad tere rahguzar tujh ko

jo tere ġham meñ bahtā hai vo aañsū rashk-e-gauhar hai

samajhte haiñ matā-e-dīda-o-dil dīda-var tujh ko

maiñ 'jālib'-dehlavī kahlā nahīñ saktā zamāne meñ

magar samjhā hai maiñ ne aaj tak apnā hī ghar tujh ko

dayar-e-'dagh'-o-'beKHud' shahr-e-dehli chhoD kar tujh ko

na tha malum yun roega dil sham-o-sahar tujh ko

kahan milte hain duniya ko kahan milte hain duniya mein

hue the jo ata ahl-e-suKHan ahl-e-nazar tujh ko

tujhe markaz kaha jata tha duniya ki nigahon ka

mohabbat ki nazar se dekhte the sab nagar tujh ko

ba-qaul-e-'mir' auraq-e-musawwar the tere kuche

magar hae zamane ki lagi kaisi nazar tujh ko

na bhulega hamari dastan tu bhi qayamat tak

dilaenge hamari yaad tere rahguzar tujh ko

jo tere gham mein bahta hai wo aansu rashk-e-gauhar hai

samajhte hain mata-e-dida-o-dil dida-war tujh ko

main 'jalib'-dehlawi kahla nahin sakta zamane mein

magar samjha hai main ne aaj tak apna hi ghar tujh ko